إزاي تبطل تدخين في رمضان؟

كل سنه وانتوا طيبين بحلول شهر رمضان. ناس كتير مننا ببستغلوا الشهر الكريم إنهم يبتدوا عادات جديدة صحية ويتخلصوا من عاداتهم القديمة أو يبتدوا دايت جديد أو عادات أكل صحية أكتر. طب والتدخين؟ ناس كتير بتستغل رمضان إنها تحاول تبطل أو على الأقل تقلل تدخين وتقضي على العاده ديه.

لو بتدخن أكيد الصيام بالنسبة لك بيبقى أصعب كمان من العادي لأن جسمك بيبقى متعود على كمية النيكوتين اللي عادة بياخدها فلما بتبتدي صيام جسمك أكيد هيعاني من قلة النيكوتين. بس ممكن كمان تستغل الصيام وإن كدة أوكدة جسمك بيكون منغير نسبة النيكوتين المعتادة فممكن يكون من السهل إنك تبطل خالص. بس ياترى هيكون فعلا من السهل عليك إنك تبطل ولا؟

في حاجات كتير ممكن تعملها تخلى قرار التبطيل أسهل عليك أو تقدر حتى تكمل تبطيل التدخين لوقت أكتر علشان كدة جايبنلك شوية نصائح تساعدك وتخلىك تقدر فعلا تبطل تدخين.

1- إعمل قائمة بالأسباب اللي عايز تبطل علشانها

القائمة دي هتساعدك تعرف وتفضل فاكر الأسباب اللي مخلياك عايز تبطل وكمان هيديك دافع أو حافز حتى في لحظات الضعف.

2- حط وقت أو تاريخ للتبطيل

لو معملتش كدة ممكن جدا تلاقي نفسك كل شوية بتقول “أخر سيجارة” وتلاقى نفسك مكمل سيجارة ورا التانية!

3- إتخلص من عدة التدخين
إرمي السجاير والولاعات والتبغ و ورق اللف. لما عدة التدخين تكون دايما حواليك وفي مرمى نظرك أكيد هتغريك وتضعف عزيمتك وممكن تلاقى نفسك ولعت سيجارة على طول!

4- دوّر على دعم من صديق 

لما تكون بتحاول تبطل مع حد من أصحابك أو عيلتك هتلاقى عزيمتك أقوي وإرادتك إنك تبطل كمان هتكون أقوى لأن الدعم والمساندة اللي ممكن تدوها لبعض هتساعدكم كتير.

5- الوجبات الخفيفه
لو نفسك في سيجارة بعد الفطار أو جسمك بيلح عليك من قلة النيكوتين حاول تنقنق أو تأزأز أي حاجة. اللب والمكسرات اللي أكيد البيت مليان بيهم في رمضان من أحسن الحاجات اللي ممكن تساعدك وكمان صحيين جدا لجسمك.

6- إعمل قائمة بفوائد التبطيل
في لحظات الضعف أكيد القائمة دي هتنفعك وهتكون أفضل صديق ليك علشان هتفكرك بكل الحاجات الكويسة اللي حصلتلك لما بطلت وهتفكرك كمان بسبب تبطيلك من الأساس وتشجعك إنك تكمل منغير  سجاير.

7- إنسى التدخين
كل مرة تحس إنك نفسك في سيجارة حاول تلهي نفسك  بحاجة. أخرج إتمشى أو إلعب فيديو جيم أو ألة موسيقية أو حتى إتفرج على حاجة بتحبها. ممكن كمان تحاول مثلا تكلم أو تخرج تشوف صحابك لأنهم ممكن كمان يساعدوك ويشجعوك تفضل مبطل.

8- ما تسبش نفسك بعد الفطار
لو إنت من مدرسة إنك تبطل مرة واحد تماما هتلاقي إن الصيام هيساعدك بما إنك كدة كدة صايم ننصحك تفضل مبطل كمان بعد الفطار. أما بقى لو إنت من مدرسة إنك تقلل تدخين بالتدريج لحد ماتبطل فخد بالك إنك ماتنساش نفسك بعد الفطار وفجأة تلاقي نفسك بتولع سيجارة من التانية وفجأة تبقى خلصت علبة سجاير بحالها.

في حاجات كتير ممكن تعملها هتساعدك تبطل تدخين بس أهم حاجة هي إرادتك إنك تبطل. أكيد إنك تبطل حاجة مش سهلة بس أكيد تستاهل لأن التأثير اللي هتشوفه على صحتك أكيد هيكون كبير! حظ سعيد ورمضان كريم!

It's only fair to share...Share on Facebook0Share on Google+0Pin on Pinterest0Tweet about this on Twitter

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *