القهوة: مفيده ولا مُضره؟

معظمنا، ده لو مش كلنا، مابنعرفش نصحى بجد من غير كوباية القهوة! قهوة تركي، أمريكان كوفي أو إسبرسو أو كابتوشينو، كل واحد وزوقه بس المهم جرعة الكافيين المتينة اللي على الصبح –ده لو مش في نص اليوم كمان!
لو بتشرب قهوة يبقى أكيد سمعت كلام كتير عن قد إيه هي مفيدة أو مضرة! ياترى إيه الحقيقة؟

تعالوا نتكلم الأول عن فوائدها.

القهوه  في الأول والأخر عبارة عن بذرة، يعني مليانة أحماض أمينية ودهون مهمة لجسمك وغيرهم كتير.
أولاً القهوة بتحسن صحة الأوعية الدموية لأنها بتزود إنتاج أكسيد النيتريك اللي بيخلي بطانة الأوعية الدموية أقوي. غير كدة كمان مليانة مواد مضادة للأكسدة هتساعدك إنك تقلل الكوليسترول بتساعد على صحة القلب عموما. المواد المضادة للأكسدة دي برضو بتساعد على صحة البشرة وممكن كمان تحميك من أو تساعد في مكافحة السرطان.
كل ده طبعاً غير المعروف عن القهوة إنها بتزود الإنتباه وسرعة رد الفعل وكمان لو شربتها قبل تمرين أو مجهود عضلي هتساعدك ماتحسش بالتعب أو الإرهاق.

نتكلم بقى عن أضرار القهوة

أولاً القهوة ممكن تزود إحتياجك أو رغبتك إنك تأكل سكريات أو نشويات وكربوهيدرات لأنها بتزود نسبة السكر في الدم فلما تأثيرها هيروح هتحس بالجوع وإحتاجك للسكريات. وبما إنها بتزود نسب السكر في الدم، فخلي بالك لو إنت بتعاني من مرض السكر. كمان القهوة ممكن تزود إضرابات الجهاز الهضمي، رغم إنها بتحفز إفراز الهرمونات والإنزيمات المهمة اللي في المعدة، لو إنت عندك أي مشاكل في الهضم القهوة ممكن تزودها. كمان للبنات القهوة ممكن تكون ليها مخاطرها لأنها بتساعد على هيمنة أو سيطرة هرمون الإستروجين اللي برغم إنه مهم وممكن كمان تكون دي حاجة كويسة، ممكن يتسبب في مشاكل زي عدم إنتظام الدورة الشهرية. لو إنت بتعاني من مشاكل في الغدة الدرقية ننصحك تبعد عن القهوة لأنها ليها تأثير كبير على الهرمونات.

أكيد مش بنقول ما تشربش قهوة، لأنها زي ماقلنا ليها فوايد زي ما ليها أضرار، لكن الإعتدال في كل شئ مطلوب. إشرب كوباية قهوة في اليوم مثلاً، هتلاقي إنك بتستفيد منها ولو ماكترتش يبقى مش هتقلق من الأضرار.

It's only fair to share...Share on Facebook2Share on Google+0Pin on Pinterest0Tweet about this on Twitter
التعليقات(2)
  1. د أحمد عبد الباسط 02/05/2016
  2. محمود 10/09/2016

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *