فوايد التين : ليه تاكل أكتر من أحلى فواكة الصيف!

موسم التين

الصيف في عزه و الـ check-ins في الفيسبوك تحسسك أن الساحل أتملى و مفيش بني أدم في القاهرة.  لكن لما يجيلك الوقت ترجع هتشوف بياعين التين على طريق الساحل و هتفتكر حلاوة طعم التين في الموسم بتاعه، فمتنساش تجيبلك منه شوية مش بس عشان طعمه، عندك أربع أسباب كمان تخلي التين من أحسن فواكة الصيف!

figs-featured

معلومة غريبة عن التين:

  • يمكن هتستغرب المعلومة دي، لكن التين بيساعد جسمك يبني عضم أقوى، لأن التين فيه كميات أساسية من المغنيسيوم و الكلسيوم و فيتامين ك-2 و التلاتة مهمين جداً لصحة و قوة عضمك. فايدة الكلسيوم كلنا عارفينها لأنه بيكون العضم، أما المغنيسيوم فبيساعد الكلسيوم أنه ينتشر في جسمك بسهولة و فيتامين ك-2 بيثبت الكلسيوم جوا العضم و بيمنع أنه يتسرب لمجرى الدم.
  • التين كويس لصحة قلبك! غير أن فيتامين ك-2 اللي فيه بيقلل من كمية الكلسيوم في الأوعية الدموية، البوتاسيوم و المغنيسيوم اللي فيه بيتحكموا في ضغط الدم، و البوتاسيوم مهم ليك خصوصاً لو كنت من الناس اللي بتستهلك كميات كبيرة من الملح و اللي بيتسبب في رفع ضغط الدم، التين هيساعدك تحافظ على الضغط في مستوى صحي ليك و لقلبك، و كمان هيقلل كمية الدهون الثلاثية في الأوعية الدموية و هيمنع تكون جلطات.

– الدايت و خسارة الوزن! مع أن التين مسكر، لكن مش بيزود وزنك لأن السكر فيه طبيعي و بيساعد على تقليل مستوى السكر في دمك، ده غير أنه مليان ألياف بتخلي عملية الهضم ابطأ و بتخليك شبعان لفترة أطول، يعني لو أنت شغال على دايت بس بتجوع كتير و مبتقدرش تستحمل، كل تين أكتر و هتقدر تمشي على برنامج الدايت بتاعك بسهولة أكبر.

– لو عندك أنيميا أو لو أنتي حامل، التين من المصادر الرئيسية للحديد و اللي بيحسن عدد كرات الدم الحمرا و بيمنع الأنيميا و مهم جداً عشان البيبي يكبر بشكل صحي في الرحم، نقص الحديد من أكتر مشاكل التغذية أنتشاراً و بيتسبب في أعراض كتير منها الأرهاق السريع و الشعور بالضعف و بيأثر حتى على الحالة النفسية، فخليك مع التين و أفرح!

It's only fair to share...Share on Facebook0Share on Google+0Pin on Pinterest0Tweet about this on Twitter
الكلمات الدليلية:, ,

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *