الطريق لإنقاص الوزن

لو هتعمل دايت أو ريجيم علشان تحسن صحتك عموماً أو لإنقاص الوزن على الأخص فأكيد دي حاجة تستاهل بس ماحدش قال إنها هتبقى سهلة. في صعوبات كتير وعوائق ممكن تقابلك لما تقرر تبدأ أي حاجة جديدة خصوصا لو الحاجة دي هتحتاجك تغير عادات في حياتك اليوميه زي الأكل والشرب لما هتيجي تعمل دايت.

قبل ما تبدأ دايت، خلينا نتفق إن الهدف مش بس تقليل الوزن بس كمان إنك تحافظ على الوزن الجديد دا، وعلشان كدة لازم خطتك للدايت يكون فيها تغييرات لأسلوب حياتك كمان مش بس الحاجات اللي هتخليك تخس لأن دي الطريقة الوحيدة اللي هتضمنلك إنك تحافظ على جسمك ووزنك ومترجعش تزيد تانى.

Weight_Loss_Scale

1- خلي أكلك صحي

شوف إخصائي تغذيه قريب منك يقدر يساعدك إنك تعمل خطة أكل مناسبة ليك. أي خطة أكل صحية لازم يكون فيها أكلات بتحبها وكمان الأكلات المفيدة اللي مش مصنعة زي الفواكه والخضروات ومنتجات الألبان القليلة الدسم واللحوم قليلة الدهن والسمك وفواكهه البحر والبقوليات والمكسرات والحبوب الكاملة.

2- خد خطوات صغيرة

لما تعمل تغييرات صغيرة في نظام أكلك وتاخدها واحدة واحدة هتلاقي أسهل عليك بكتير إنك تستمر في إنقاص الوزن وتلتزم بالدايت. حاول تعمل قائمة بالعادات اللي إنت شايفها مش مناسبة أو اللي عارف إنها غلط ومحتاج تغيرها وإبتدي تغير حاجة واحدة بس في الإسبوع. ده هديك وقت إنك تتعود على التغيير براحتك وتبقى مرتاح. إفتكر إن هدفنا إن إحنا نغيير العادات القديمة بعادات جديدة أصح تقدر تفضل عليها طول عمرك.

 3- خلى أهدافك واقعية

معظم الناس اللي بتحاول تخس بتبقى أهدافها بعيدة وغير واقعية. مش بالضروه تخس 10 كيلو في شهر عشان صاحبك خس قدهم فى نفس المده ولا من الطبيعى ان الفستان بتاعك ايام المراهقه ترجعى تانى تلبسيه عادى . حاول تخلى هدفك في الأول إنك تخسر حوالي 10% من وزن جسمك لأن ده مش بس هيحسن موودك، بس كمان هيحسن صحتك بشكل عام وهيساعدك تقلل من احتمالية الاصابه بأمراض كتير زى الضفط والسكر والكوليسترول. وخليك كمان فاكر إن الخبراء بيقولوا إنك الوزن المثالي اللي تقدر تنزله كل إسبوع هو من نص كيلو لكيلو ونص من وزنك المبدئى، فخد الموضوع بهدوء انت مش داخل سباق.

4- الثواب مش العقاب

كافئ نفسك لما تحقق أهدافك ومش لازم تستخدم الأكل كمكافئة لنفسك حاول مثلا تشتري لنفسك جينز جديد أو حاجة بتحبها وبكدة هتبسط نفسك. حاول كمان متبقاش قاسىعلى نفسك بزيادة، يعني لو يوم مقدرتش تمسك نفسك عن أكلة دسمة بلاش تأنييب الضمير اللي مش هيوصلك لأي حاجة. إعرف إن ده عادي وإنه هيحصل أكيد وتوقعه لأنك لما تتوقعه هتعرف تجهّزله وتعدي الموضوع عادي وترجع تاني للدايت بتاعك ولخطتك. إعمل أقصي مجهودك 80% من الوقت وحاول ترتاح ال20% التانيين.

5- أطلب دعم

 الدعم اللازم او التشجيع من أهم الحاجات علشان تقدر تقلل وزنك. ممكن دعمك يكون حد من عيلتك أو أصحابك أو زمايلك في الشغل ممكن ييجي معاك لما تخرج تمشي أو تجري أو تتمرن. الناس دول هيبقوا مصدر طاقة وإلهام ليك في رحلتك علشان تخس بإستمرار وخصوصا وقت ما الموضوع  يبقي صعب عليك لأنهم أكيد هيشجعوك إنك تكمل ويخلوك فاكر أهدافك الأساسية.

6- إكتب أكلك

لو عايز تخس او تقلل وزنك، ممكن تجرب تكتب كل حاجة بتاكلها خصوصا لو إنت من النوع اللى  بيحب ينقنق او يرمرم. ده هيساعدك تشوف بالظبط أكلك عامل إزاي وتسيطر على الكميات ونوع الأكل.

7- إوزن نفسك كل إسبوع

إوزن نفسك بنفس الميزان وتجنب تماماً إنك توزن نفسك كل يوم لأن ده أكيد هيحبطك ويهبط عزيمتك!

8- إتحرك!

الاكل الصحى وتقليل السعرات الحرارية لوحده مش كفاية، لازم تتحرك بإستمرار وتلعب رياضه ولو حتى المشى علشان تقدر فعلا تحقق أهدافك. أحسن وقت تتمرن فيه أو تلعب أي رياضة هو أول ما تصحى علشان تضمن إنك ماتتشغلش وتطنش بعدين في اليوم. إعرف من إخصائي التغذية تأكل إيه قبل وبعد التمرين خصوصا لو هتتمرن الصبح.

لو أخذت قرار إنك تغيير حياتك وتبقى صحي لازم تعرف إن الطريق مش سهل، بس في الأخر أكيد يستحق كل مجهودك. حاول تفضل إيجابي وتكمل للأخر وأكيد هتوصل للي إنت عايزه.

 

 

 

 

It's only fair to share...Share on Facebook0Share on Google+0Pin on Pinterest0Tweet about this on Twitter

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *