مشاكل النوم وعلاقتها بنظامك العذائى

كلنا طبعاً عارفين إن النوم والأكل من أهم الحاجات لصحتنا وكمان لمستوى نشاطنا في اليوم، بس ياترى ممكن النوم والأكل يكونوا مرتبطين؟ الدراسات بتقول أه..

تعالوا نبتدي الأول بليه الأكل مهم قوي كدة للصحة. مش بس الأكل مهم علشان نحافظ على لياقتنا وعلى جسمنا بس كمان علشان جسمك ببساطة “يشتغل كويس”. جسمنا زي الماكينة والأكل الصحى زي زيت الموتور النضيف، يخلي ماكينتك تشتغل أحسن. ماهو برضو أكل صحي يساوي حياة صحية، ولا إيه؟

النوم كمان مهم جداً برغم إن العلماء لحد دلوقتي مش متأكدين إحنا ليه جسمنا بيحتاجه للدرجة دي، بس هم عارفين إن قلة النوم ممكن تأثرعلى حدة تفكيرك أو تأثر عليك جسدياً أو تضعف جهاز مناعتك. لأ ومش بس كدة لو إنسان مانمش خالص لمدة، الجسم بينهار وبيؤدى للوفاه !

لو نومك خفيف أو بتعاني من أرق بإستمرار، فيه دراسة من أكاديمية طب النوم الأمريكية معمولة مخصوص علشانك. الباحثين دول أثبتوا إن نوعية الأكل ليها تأثير مباشر على نومك وخصوصاً على الأرق. لقوا في الدراسة دي إن لما الأكل خلال اليوم بيكون صحي أكتر، الناس موضع الدراسة أخدوا متوسط 17 دقيقة علشان يناموا بدل من 29 دقيقة لما أكلوا أكل مش صحي.

1a1dd53

الدراسة بتقول إن كمية الدهون المشبعة والألياف اللي في أكلك ليها تأثير مباشر على الوقت اللي بتقعده من أول ما تحط راسك على المخدة لحد ما بالفعل تنام. لو قللت الدهون المشبعة وكترت الألياف المفروض إن ده يخليك تعرف تنام أسرع. وكمان الدراسة إقترحت إن السكر كمان ليه تأثير على نومك وإن كتر السكر بيخلى نومك خفيف ولو قللت أو بطلت سكر هتنام أعمق وأحسن. إحنا مش متفاجئين بما إن السكر ليه أضرار أكتر من حاجات كتير –ليهم حق يسموه السم الأبيض.

خبراء النوم خايفين من حاجة في الدراسة دي وهي إن يحصل دايرة متواصلة من النوم السئ والأكل السئ. يعني مثلا في يوم تأكل وحش فتنام مش مرتاح وتقوم تعبان تاني يوم وبالتالي متركزش إنك تأكل كويس…وهكذا…

حاول تأخد بالك من أكلك و إزاي بيأثر على نومك. لما بتلخبط في أكلك حيأثر على طول على نومك، بس برضو لما تاكل كويس هتلاقي نفسك بتنام كويس. التغييرات الصغيرة في أكلك ممكن تعمل فرق كبير وتخليك تبدأ تبقى صحي أكتر ومرتاح أكتر وتعيش أحسن.

It's only fair to share...Share on Facebook0Share on Google+0Pin on Pinterest0Tweet about this on Twitter
الكلمات الدليلية:, , , , , ,

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *