نصائح للعناية بشعرك

شعرك هو تاج جمالك وإهتمامك وعنايتك بيه لازم يكونوا جزء من روتينك وعلى قائمة أولوياتك. لكن ما بين كل الحاجات اللي بنسمعها وكل النصائح الموجودة في كل حتة ممكن تكوني مش عارفة تعملي إيه ولا إيه لشعرك. شعرك لو طويل أو قصير، مفرود أو كيرلى، لازم تديله اللي محتاجة واللي مناسب ليه.

1439830191_woman-brushing-hair-with-natural-brush

أول حاجة لازم تهتمي بيها لجمال شعرك هي أكيد الأكل. لو عايزة تخلي شعرك صحي ولامع يبقى لازم تأكلي كويس علشان شعرك يأخد التغذية اللي عايزها. الأكل اللي فيه فيتامين سي زي الحوامض مثلا بيقوي شعرك ويمنعه من التقصيف والتكسير. كمان الأكل اللي فيه حديد زي السبانخ والكبدة بتساعد على تنشيط الدورة الدموية في فروة الرأس. كمان الأحماض الدهنية زي الأوميجا 3 مثلا اللي موجود في الأسماك وفواكه البحر بيساعد شعرك ينمو أسرع وأصح كمان. وطبعا مش محتاجين نقولك إنك لازم تفضلي تأكلي صحي علشان تشوفي نتيجة ملحوظة على شعرك.

 

غسيل الشعر ممكن يكون له تأثير على شعرك سلبي جداً لأن الشامبو والمواد الكيميائية ممكن يجهد شعرك وينشفه. إستخدمي كمية شامبو على قد شعرك، وممكن كمان تشطفي شعرك بخل قبل الشامبو لو عايزاة يبقى أنضف وأنعم. الميه الباردة كمان أصح على شعرك من الميه السخنة اللي ممكن تضعفه وتزود فرص التكسير والتقصيف.

 

المكواة وفرد الشعر أكيد كمان بيضره، حاولي ما تفرديش شعرك أكتر من مرة في الإسبوع لو عايزاه يفضل صحي، خصوصا كمان إن خبراء الشعر بيرجحوا غسيله مرة أو مرتين في الإسبوع بالكتير علشان تدي فروة رأسك فرصة إنها تفرز الزيوت المهمة اللي شعرك محتاجها لتغذيته.

حمامات الزيوت ممكن يكون تأثيرها ولا السحر. جربي الزيوت الطبيعية زي جوز الهند أو زيت أملا قبل ما تغسلي شعرك، مش بس هيخلوا شعرك صحي ولامع، لأ كمان هيغذوه ويرطبوا ويحموا فروة رأسك من القشرة والجفاف.

 

وطبعا مش محتاجين نقولك تستخدمي مشط واسع وتسرحي شعرك بالراحة ومنغير شد! وكمان إفتكري إنك لو عايزة شعرك يطول بسرعة وبصورة صحية قصي أطرافة –خصوصا التكسير والتقصيف- بإستمرار.

 

لو عندك نصائح تانية متجربة للشعر أو لو جربتي الحاجات دي، قوليلنا عملت إيه وشاركينا خبرتك. وإفتكري إن لكل شعر اللي يناسبه فإسمعي لشعرك وإعرفي هو عايز إيه.

 

 

 

 

 

It's only fair to share...Share on Facebook1Share on Google+0Pin on Pinterest0Tweet about this on Twitter
الكلمات الدليلية:, , , , ,

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *