20 نصيحة إتيكيت لكل Lady متفوتيهمش

كل بنت ببقى نفسها إنها تتعامل بشياكة ورقي واحترام زى ما بنشوف شخصيات الـ Ladies في المسلسلات والأفلام أو في الحقيقة مع الأميرات زي Princess Kate مثلاً وبنتفرج علي طريقتهم في التعامل مع اللي حواليهم وقد إيه بيبقي فيه بساطة وشياكة وبنبقي معجبين جداً بيهم!

والحقيقة دى حاجة مش صعبة والموضوع كله فى إديكى إنتى علشان تلاقى الناس من حواليكى سواء فى البيت أو فى الشغل أو حتى وسط أصحابك وقرايبك بيتعاملوا معاكى بشياكة و إحترام كأنك Princess بالظبط، لازم إنتى كمان تكونى بتحترميهم وبتتعاملى معاهم بشياكة وذوق علشان تبان أخلاقك الحقيقية الحلوة ويبان جمالك الداخلى اللى مهم زي جمالك الخارجى بالضبط ولأنه الفن اللى بيعلمنا إزاى نتكلم ونتعامل مع الناس حوالينا فى المواقف المختلفة هو فن الاتيكيت، فى المقال ده هنقولك على 20 نصيحة إتيكيت ممكن تغير حياة كل بنت وتخليها Lady بجد.

20 نصيحة أتيكيت لكل Lady متفوتيهمش

1. لو إنتى قاعدة مع جوزك أو خطيبك أو حتى زميلك فى الشغل وخدتى بالك إنه عارف قواعد الأتيكيت وبيقف لما تيجى تقومى من على الترابيزة، من قواعد الإتيكيت إنك تقعدى على طول وماتخليهوش واقف كتير.

2. طبعاً قاعدة أساسية إنه ماتتكلميش أبداً وفىه أكل فى بقك، ويفضل تشربى بق مياة بعد ما تبلعى الأكل وبعدين تتكلمى.

3. لازم تاخدى بالك من كلامك و الألفاظ اللى بتستخدميها، الكلمة الحلوة تقدرى بيها تكسبى أى حد.

4. لازم تلبسي علي حسب المناسبة وتعرفى إيه هو اللبس اللى يمشى مع المناسبات المختلفة .. بتفرق قوي!

5. نصيحة أتيكيت مهمة جداً هى إنك ماتطلبيش أى حد فى التليفون قبل 9 الصبح و بعد 9 بالليل.

6. لما تقابلى حد جديد بدل ما تقولى “اهلاً”بس، يفضل إنك تسلمى وتقولى “إتشرفت بمعرفتك” أو “فرصة سعيدة”.

7. وقت العزومة أو لو فى إجتماع او بتاكلى مع أصحابك فى النادى مثلا إعملى الموبايل Silent.

8. نصيحة إتيكيت مهمة جداً إنك لما تطلبى حاجه تقولى “لو سمحت” أو “من فضلك” و كمان تقولى “شكراً”.

9. لما تيجيى تجاملى حد أو تشكرى حد على حاجة حاولى تكونى تقصدى اللى بتقوليه فعلاً ويكون طالع من قلبك.

10. اللى بيخلى أي بنت تبقي Lady هى أخلاقها، علشان كده الـ Lady لازم تساعد الناس من حواليها، فلو لقيتى حد كبير فى السن مثلاً قومى و خليه يقعد مكانك ووفريله أي مساعدة تقدري تقدميها.

11. لو إتعزمتى على حفلة أو فرح لازم تقرى الدعوة كويس ولو فيها قواعد معينة فى اللبس أو عدد الضيوف لازم تلتزمى بيها.

12. وقت العزايم ماينفعش أبداً تروحى من غير هدية، الهدية هتبين تقديرك وحبك لصاحبة العزومة.

13. لازم تكون كلمتك واحدة، يعنى ماتقوليش حاجة إلا إذا كنتى تقصديها ولو وعدتى لازم توفى بوعدك.

14. لو متفقة على ميعاد مع خطيبك إستنيه لما يتصل بيكى و يأكد هو الميعاد، ماتستعجليش و تتصلى إنتى.

15. حطى لنفسك Time Frame بمعنى إنه لازم يبقى معروف عنك إنه وقتك منظم وماينفعش تنزلى تخرجى فى أى وقت، رتبى خروجاتك على الأقل قبلها بيومين.

16. لو بتقابلى حد لأول مرة علشان تتعرفوا على بعض مثلاً حاولى متتقابلوش فى مكان مفضل ليكى أو ليه وتكونوا معروفين فيه، الأفضل إنكوا تتقابلوا فى مكان جديد ومحايد.

17. حاولى ماترجعيش البيت بعد 10 بالليل، علشان تكونى Lady لازم تخرجى من البيت و ترجعى فى أوقات مناسبة ومش متأخرة.

18. دايماً قدرى اللى الناس من حواليكى بيعملوه علشانك وحاولى دايماً تقولى كلمات لطيفة زى شكراً.

19. لو معزومة على الغداء فى مطعم إستنى لما اللى عازمك يطلب هو الأول عشان تقدري تحددي الطلبات اللي بيطلبها سعرها حوالي قد إيه وتطلبي حاجات بنفس الأسعار تقريباً، ولو أصر إنك إنتى اللى تطلبى الأول حاولى تطلبى حاجات سعرها مناسب ومتكونش غالية، و دايماً إعرضى إنك إنتى اللى تدفعى الحساب أو على الأقل تدفعى الجزء الخاص بيكي.

20. دايماً لما حد يبقى بيتكلم معاكى سواء بيناقشك أو بيفضفضلك لازم تبقى مستمعة جيدة وتديله إهتمامك كله وماينفعش خالص تمسكى تليفونك، الـ Lady دايما بتظهر إهتمامها ورغبتها فى المساعدة.

Share this...
Share on FacebookShare on Google+Tweet about this on TwitterShare on LinkedIn
الكلمات الدليلية:

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *